Mundartgedichte
KOSTPROBEN VON MEINEN MUNDARTGEDICHTEN
(KURZE AUSZÜGE)
Katzenerlebnisse
I hob a großes Haus mit Areal,
drin wohnt mei Katznpersonal.
Anmutig und schlaunk is mei Figur,
a richtigs Wunder der Natur,
ein edles Fell meinen Körper gaunz umschmeichlt,
des g’spiat ma glei‘, waun ma mi streichlt
und bin mit meiner Katznstimm,
ein absoluter Hauptgewinn,
wei‘ die muaß gaunz wos b‘sondres sei‘,
kaum mauz i, eilts Herrchen schon herbei
und mir wos Gutes gleich serviert,
sche, wauns Herrchen so pariert………
A Magnetbandl hängans mir um,
damit i beim Türchen einikumm.
In neonfoarbm hob i’s kriagt,
a jede Maus mi scho von Weitem siagt,
des woa a wengal bled
und a des Gfüh’ am Hois, des mog i net.
Hob’s hinterlegt auf’n Nochbarn sein Kompost
und mir docht, dass des Bandl dort varost‘………..
Jetzt hob i – i muaß direkt lochn,
sogoa amoi a Maus bestochn
und hob sie – völlig unverletzt -
ins Wohnzimmer hinein gesetzt,
damit`s am Obnd daun - s`Programm is eh so fad -
rennt vor den Fernsehapparat,
sämtliche Lebensgeister woan geweckt,
ois des Frauerl die Maus entdeckt!
Die Fiaß sie in die Höhe reißt,
damit des Ungetüm sie net in d`Zechn beißt,
so wird Gymnastik gleich gemacht –
a spitza Schrei duarchdringt die Nacht!...............
Frisörin
.....do wiad geschnitten, das’ ois fliagt
und ma sei’ G’sicht goa nimma siagt,
do fliagt da Kaumm, do fliagt die Schea
und a die Biaschtn hintahea,
daun kummt a Hoafoab hintadrein,
waunst „in“ sei’ wüst, daun muaß des sein!
Damit’s die Haare net vaweht
wean bunte Wickla aufgedreht.
Do wiad gefönt, do wiad frisiert
und daun schen olles auftoupiert,
zum Schluß kummt drauf a Menge Spre
und daun san d’Hoa glei’ wieda sche…………….
Da Geschenkskoab
Ans deaf net fön, gaunz ohne Frog’,
a guates Brot ois Untalog.
Net z’hoat, dass ma’s a guat dabeißt
und an die Zehnt net aussareißt.
A Fisch is drinnen, in da Dose,
umhüllt von ana guatn Soße,
dazua gibt’s nu an Paprika,
schene Radieschen haum ma a,
Essigguakal – eig’legt in a Marinad,
do schmeckns übahaupt net fad.
An Schliabocha – dea hot an Duft!
Do braucht’s dazua a frische Luft!
Damit si a ka Koik aulegt,
is nu a Knoblauch einig’steckt………………..
Fernsehsessel
Dieser Sessl bietet viele Funktionen,
die sich auf olle Fälle lohnen.
Er ist ein ergonomisches Produkt,
damit am Rückn jo nix druckt
und kommod is ohne Frage,
die zusätzliche Fußablage.
Er hot a aungenehme Breite
und a Toschn auf da Seite
und somit hot man gleich parat,
die Bedienung für den Fernsehapparat.
Damit man erreichboa is zu jeder Zeit,
liegt des Handy drin glei griffbereit.
Doch damit ist’s noch nicht gewesn,
man kaun a Zeitung einigebm zum Lesn.
Waun ma amoi drin schlofm mecht,
do is die Liegeposition grod recht,
ma braucht nur d’Fernbedienung länger drückn
und scho liegt ma auf’m Rückn…………